Aug 30, 2013

ஏழுமலையான்

ஏழுமலை இருக்க நமக்கென்ன மனக்கவலை
ஏழேழு பிறவிக்கும் எதற்கும் பயமில்லை


பாடும் பாட்டெல்லாம் பரந்தாமனின் பாட்டு
நாளும் நடப்பதெல்லாம் நாரணன் விளையாட்டு

கால்வண்ணம் அகலிகைக்கு வாழ்வு தந்தது
கைவண்ணம் திரௌபதையின் மானம் காத்தது
மால்வண்ணம் திருமகளின் மனம் கவர்ந்தது
மணிவண்ணம் கருணை நம்மை மகிழவைத்தது



ஒருபிடி அவல்கொடுத்தே குசேலன் உறவுகொண்டான்
ஓடத்தில் ஏற்றிவைத்தே குகன்உடன் பிறப்பானான்
தான்சுவைத்த பழங்களையே தந்தனள் தாய்சபரி
தருவதற் கொன்றுமில்லை தலைவனே எமையாதரி

மகாகவி காளிதாசன்

காலத்தில் அழியாத காவியம் தரவந்த
மாபெரும் கவி மன்னனே - உனக்குத்
தாயொரு மொழி சொல்லுவேன்


உணர்ச்சியில் விளையாடும் உன்னதக் கவிச்சிங்கம்
தளர்ச்சியில் விழலாகுமா - மகனே
சந்தனம் சேறாகுமா?

பல்லக்குப் பரிவாரம் படையுடன் முடியுந்தன்
சொல்லுக்கு விலையாகுமே - மகனே உன்
தோளுக்குள் புவி ஆளுமே


ஊருக்குக் கதை சொல்வோர் உள்ளத்தை வதை செய்தால்
சீர்பெறும் கவி வாடுமே - மகனே
தெய்வத்தின் முகம் வாடுமே

வாழ்வென்றும் தாழ்வென்றும் வளமென்றும் குறைவென்றும்
சக்கரம் சுழல்கின்றது - அதில் தான்
சரித்திரம் நிகழ்கின்றது


யாருக்கும் வாழ்வுண்டு அதற்கொரு நாளுண்டு
அதுவரை பொறுப்பாயடா - மகனே என்
அருகினில் இருப்பாயடா

Aug 5, 2013

பழம்பொருள் நீ

தரவு கொச்சகக் கலிப்பாக்கள்

நெடுநாள்கள் கடந்துதொடங் கும்பாடல் இதன்வழியென்?
துயரெல்லை யோ?வினிமை யோ?வென்ன? யானறியேன்
யாரென்றன் மனமமைதி பெறவுரைப்பார்? இச்செய்தி
அவள்செவிக்கெட் டிடநானு ரைத்தக்கால் அந்தோ?                       1

'பழம்பொருணீ  பாரீசைப் பார்க்கச்சென் றிடத்தாஅன்
அழைத்ததியார்? அறியாய்நீ யுலகினிலே யாதொன்றும்'
களிப்புடனே கலாய்த்துரைத்தாய் அதுதானுண் மையெனினும்
ஏனுள்ளே னிங்ஙனம்யான்  எவ்வாஅ றுரைப்பேனோ?                   2

என்சொல்ல வாயெடுத்தும் என்னெண்ணம் அதைச்சொல்ல 
யாருணர்வார்  ஆனாலும் அவர்தம்சொல் லஃதொன்றில்
உறுதியுடன் உள்ளாற உளமுரைப்பார் வளமுரைப்பார்
மாற்றமெலாம் காற்றலையாய் அதிவிரைவில் வந்திடுமோ?    3

ஒருதுருவத் துள்ளத்தை மருதுருவ மாய்க்காட்டி
ஒருநொடியில் யார்மாற்ற முடியுமிவண் உரைப்பீரே?
படிப்படியாய்ப் படிபெறவே முடியுமுண்மை வேறென்ன
கடிதிலுளம் கவின்பெறுமா? கடிதேஎ சொல்வீரே                             4
                                    - தமிழகழ்வன் சுப்பிரமணி சேகர்