உலகம் இந்நாள் உணரா தவளே!
அலரினைக் கண்டொரு நாளும் அஞ்சா(து)
ஈண்டென் செய்கிறாய்? இதுவிளை யாட்டா?
வேண்டுவ தென்னவோ? வேட்கை என்னவோ?
நாடொறும் நாடி வலைத்தளம் மூலம்
அறியாப் பலரொ(டு) அளவ ளாவலும்
மீண்டும் மீண்டும் முகிழ்க்கும் மலராய்
அடுத்த நாளே மறந்ததாய்க் காட்டி
உறவு முறையில் உடன்பிறந் தான்போல்
உரிமைச் சொற்கொண்(டு) உரையா டுவதும்
எல்லை மீறியோர் எடுத்தாள் கின்ற
குலவு மொழிக்கும் குதுகலம் அடைதலும்
பாது காப்பினைக் காற்றினில் பட்டமாய்
யாது முணராது பறக்க விடலும்
எங்கே முடியும் என்றறி யாத
நங்காய் உனக்கு நல்லழ கிலவே!
