காலம் கடந்தபின் வந்த ஞானம்

உள்ளத் துள்ளே ஓடுவ தென்ன?

கள்ளத் துள்ளே கரைத லின்றி

மெல்ல மெல்லப் புரிந்து கொள்ள

நல்ல வாய்ப்பாய் வாய்த்த சமூக

வலைத்தளத் தூடே வரையறை யின்றி

அளவ ளாவும் ஆவல் கொண்டு

களவ ளாவ லாகக் கனிந்தேன்

இஃதென் னுரிமையோ? இடந்தரு நிலைமையோ?

உறவா? நட்பா? உறவில் எவ்வகை?

முகமறி யாத முனைவிஃ(து) அறமா?

காலம் பதில்சொலக் காத்திருந் தேனே

காலம் கடந்தபின் வந்தது ஞானமே

                             - தமிழகழ்வன்

நண்பர் அருண்குமார் எழுதச் சொல்ல எழுதியது.

இந்தக் காலப் பிள்ளைகள் - சமுக வலைத்தள அடிமைகள்

புரியாத புதிராய்ப்

புளகாங்கிதம் அடைந்தேன்

புன்னகை பூத்தன உதடுகள்

புதுமலர்ச்சி கொண்டது என் முகம்

புதிதாய் ஓர் உறவு

நட்பு நாடி வந்தது...

நலமா? என்றது

நாட்டமெல்லாம் என்ன?

நாளெல்லாம் என்செய்வாய்?

நானாகக் கூறும் முன்

நாலாயிரம் கேள்விக் கணைகள்

அடுக்கடுக்காய் வந்ததிலே

அசந்து போனேன்

அப்படி என்ன

ஆர்வம் அவளுக்கு?

ஒருவேளை

உளவு பார்ப்பவளோ?

இல்லை இல்லை

உதவி கேட்பவளோ?

இல்லை இல்லை

உடன்பிறவாத உறவானவளோ?

இல்லை இல்லை

ஒரே வகை விருப்பமுள்ள

உள்ளம் நாடி வந்தவளோ?

உண்மையைச் சொல் எனக்

கேட்க மனமில்லை

கேட்டுக் கொண்டே இருந்தேன்

கேண்மையானவளின்

கேள்விகளையே

ஏன் ஏன் என்று

ஊர் உறங்கிய பொழுதிலும்

உள்ளம் உறங்காமல்

உறவாடிக் கொண்டே இருந்தது

உவகை உற ஆடிக் கொண்டே இருந்தது

உனக்கென்ன பிடிக்கும்? என்றாள்

உன்னுடைய கொள்கை என்னென்றாள்?

தனக்கென்ன பிடிக்கும்

தன்கொள்கை இதுவென்று

தாராளமாய்ப் பகிர்ந்தாள்

ஆறு மாதம் ஆனதும் அவள்

வேறு விதமாய் வந்தாள்

கொஞ்சங் கொஞ்சமாய்த்

தன் பேச்சை அடக்கிக் கொண்டாள்

என்பேச்சையும் கேளாமல்

அடங்கிக் கொண்டாள்

காரணம் என்னவென்று

புரியாமல் விழித்தேன்

காலத்தை வெறுமையில் கழித்தேன்

"முகம் பார்த்திராத

மூத்தவனாய்க் கொண்ட ஒருவன்

வேலைப் பளுவால்

விட்டு விலகியவன்

மீண்டும் வந்துவிட்டான்

முன்போல் என்னிடம் 

பேச வியலாது" என்றாள்

"அவன் சொன்னால்

அப்படியே நிற்பேன்

அப்படிப்பட்ட அண்ணனவன்"

எப்படி இப்படிப் பேசினாள்

எதிரே இருந்தும்

இழுபறியாய்க் கடக்கும்

முகிற்கூட்டம்போல்

முனைந்து சென்றாளோ?

காலத்தைக் கடக்க மட்டுமே

கடிதில் உறவைக் கொண்டாளோ?

அவளே அதை முறித்தாளோ?

மீனழகு - ஆசிரிய விருத்தம்

மின்னி மின்னிச் சிரிக்கின்ற
   மீன்கள் கோடி வானத்தில்
கண்ணில் பட்ட ஒருமூன்று
   கருத்தில் நுழைந்து களிப்பூட்டும்
மின்னும் அவையோ நேர்க்கோட்டில்
   மீண்டும் காணோம் எனத்தேடும்
அன்ன நிலவு குழந்தையைப்போல்
   ஆர்வத் தோடு நான்களிப்பேன்

பல்வான் அலகு தூரத்தில்
   பல்லைக் காட்டும் மீனழகு
நில்லா மேகம் மறைத்தாலும்
   நின்றொ ளிர்ந்தொ ளிந்திருக்கும்
எல்லாம் உணர வைக்கின்ற
   எண்ணம் கூட்டும் இவ்வுலகில்
இல்லாச் சுவையும் பொதித்திருக்கும்
   இன்னும் இன்னும் களிப்பூட்டும்

எண்ணி எண்ணி வியந்திருந்தேன்
   எல்லா மீனும் ஒளிருமெனக்
கண்கள் விருந்தால் களித்திருக்கக்
   கடிதில் மறையும் சிலமீன்கள்
விண்ணில் தொலைவில் ஒளிர்வதெல்லாம்
   விரும்பா தோவந் தருகமைய
நண்ண லில்லை நம்கைக்கு
   நடப்ப தில்லை நம்மோடே

- கருத்தாக்கம்: அருண்குமார்
- கவியாக்கம்: தமிழகழ்வன்

காரணம் உண்மையா பொய்யா?

காரண மின்றிக் காரிய மில்லை

காரண மொன்றக் கவலைக ளில்லை

காரண மில்லாப் பொய்ம்மையி னாலே

காரியம் நன்மை பெறுவது மில்லை

காலமும் சிலவே கண்களை மறைக்கும்

கடிதினில் உண்மை கருவிழி நிறைக்கும்

காரணம் பொய்யின் காலடி வீழின்

கசப்பென மாறும் வாழ்க்கையும் பாழே!

பொறுமையும் வெறுமையும்

பொறுத்துப் போகப் போக

வெறுத்துப் போக வைக்கும்

எல்லாம் ஓர் அளவுதான்

மீறினால் பெரும்பிளவுதான்

விரும்பாத இடத்தில் கொடுக்கும்

விருந்தும் இனிக்காது கடுக்கும்

பாரதி சொன்னார் அன்று

பாரினில் யாவும் மாயை என்று

சொல்வதற்கொன்றும் இல்லை

சோதனைகட்கு இல்லை எல்லை

மானிடம் மீண்டும் வெல்லும்

நம்பிக்கையில் வாழ்க்கை செல்லும்

காடு - ஐக்கூஉ

பெரிய காடு

சுற்றித் திரியும் விலங்குகள்

தலையில் பேன்கள்

மனமே மருந்து - நேரிசை வெண்பா

உருவம் இலாதன உள்ள இடமும்

தெரிவதில்லை உன்மனத்தைத் தேடி - வரிவரியாய் 

வந்துழலச் செய்யும் வலிகளே மாற்றங்கள்

நொந்தும் மனமே மருந்து

ஐந்தாண்டுகள் நிறைவு வாழ்த்துக்கள் - உபேந்திர குமார் சிங்கு

உள்ளத் துள்ளே ஓரா யிரங்கதை
வெள்ளம் போலே விரைந்தெழும் கவிதை

புயலில் சிக்கும் புதுப்பட கைப்போல்
முயல முயல முதிர்ச்சி தெரியும்

இயலா தனவெனும் எவ்வகைச் செயலும்
முயலா தனவாம் வேறொரு வழியில்

செயலில் தெரியும் சீரிய எண்ணம்
பெயலில் தெரியும் பெருமழைப் பெருமை

வெற்றுக் காட்டில் விதையை ஊன்றியும்
வெற்றிக் காடாய் விளைத்துக் காட்டுவீர்

தட்டிக் கொடுத்துத் தேரச் செய்வீர்
சுட்டிக் காட்டித் திறமையை வளர்ப்பீர்

பதவியின் பயனோ பலர்க்கும் பயன்பட
உதவுமனப் பான்மையே! உணர்ந்தீர் உபேந்திரரே!

வாழிய எண்ணங்கள் வாழிய சொற்கள்
வாழிய செயல்கள் வாழிய வாழியவே!
                                  - தமிழகழ்வன் சுப்பிரமணி

----

Dear Upen,
Many congratulations on completing 5 years with OpenText!

Here is my poem for you!
Translated by Google.
Refined and rhymed by AI.

----
A thousand tales reside inside,
Poetry flows like the ocean’s tide.

Like a boat adrift in a storm's embrace,
Wisdom is shaped through trials we face.

What seems impossible in one way done,
Awaits another path begun.

Consciousness speaks through deeds we do,
The rain knows what the storm is true.

Plant a seed in barren earth,
And soon a forest will find its birth.

Strike the stone, and it will bend,
As you guide others to ascend.

The privilege of rank is not in might,
But in the power to lift others to flight.

This truth, Upendra, you’ve understood,
And now you live it as you should.

May your thoughts endure the test of time,
May your words inspire in endless rhyme.

May your deeds resound in every heart,
Long live Upendra, in thought, word, and art!

இனிய பிறந்தநாள் வாழ்த்துகள் - காளிதாசு

அரும்பெருஞ் செயலை அடிநுனி நோக்கிக்

கரும்பெனக் கருதிக் கடித்துக் கடித்துச்
சுரும்பெனச் சுவைத்துச் சுவைத்து மகிழும்
அரும்பே! மொட்டே! முகையே! மலரே!
வருபெருந் துயரெலாம் வாட்டி வதக்கிக்
கருதிய உரைத்துத் கசடறக் கற்றுத்
தருவென வளந்தரத் தகுதியை உயர்த்திப்
பொருப்பென நிற்கும் பொறுப்புடை யோனே!
மருளல் வாழ்வை மயக்கும் நிலையெனத்
தெரிபொருள் தெளியும் திருவுடை யோனே!        10
விருட்டெனச் செயலைத் தொடங்கும் வீரத்
திருமக னாகத் திருந்துளத் தோனே!
பொருட்டோ இவனெனப் பொறாஅ தவனை
விரும்பா தவனே! வெல்லும் தவனே!
நருட்டோ உசுமாக்கி நாடகத் தோனே!
பெருமை உலகோய்! பிறந்தநாள் வாழ்த்துகள்!
விரும்பிய வெல்லாம் வெற்றி கொண்டு
பொருந்திய உளத்துப் பொறுநர் சூழ
அரும்பெரு வாழ்வை அமைத்து மகிழ்க!
கரும்புளத் தோனே! காளி தாசனே!                         20

                                          - தமிழகழ்வன் 

இன்பொருள் மென்பொருள்

மின்பொருள் கண்டார் வியனறி வியலார்

மின்னணு வியலாம் நுண்பொருள் கண்டார்

கண்ணெனும் எண்ணும் எழுத்தும் கருதி

மின்னும் திரையில் இன்பொருள் கண்டார்

என்பொருள் என்னின் மென்பொரு ளாமே

வன்பொருள் எல்லாம் மென்பொரு ளாக்கும்

அறிவின் ஊற்றாய் அதுவளர்ந் தோங்கி

நுண்ணறி வினையும் செயற்கை செய்தார்

வையத் தளவில் வாணிக மெல்லாம்

செய்யக் கொடுத்தார் செயற்பொறி யாளர்

மென்பொரு ளின்றியிவ் வுலகில்

என்பொருள் இயங்கும் என்னும் நிலையே!

                        - தமிழகழ்வன் சுப்பிரமணி