Mar 16, 2025

எளிய மொழியும் கலப்படமும்

படிக்காத பாமர மக்களின் மொழி ஓர் எளிய மொழியாக இருந்திருக்க வேண்டும். எளிதில் பலுக்க இயலாத கூட்டொலிகள், காற்றொலிகள் இவற்றைக் கொண்டதாக இருக்க முடியாது. இத்தகு காற்றொலிகள், கூட்டொலிகளைப் பலுக்க அதிக முயற்சி தேவை. அதிக ஆற்றலைப் பேசுவதற்காகவே செலவிடும் மக்கள் மற்றவற்றில் எப்படி கவனம் செலுத்த முடியும்?

தென்னிந்திய மொழிகள் வடவிந்திய மொழிகளைப் போல் அவ்வளவு கலப்புகள் கொண்டதாக இருக்கவில்லை. சங்கதத் திணிப்பின் காரணமாகத் தமிழைத் தவிர மற்ற தென்னிந்திய மொழிகள் கூட்டொலிகளையும் காற்றொலிகளையும் ஏற்றுக் கொண்டன. அம்மொழி பேசும் மக்கள் மொழிக்கலப்படத்தால் ஏமாற்றப்பட்டிருக்கின்றனர்.

தமிழிலும் ஜ ஹ ஷ ஸ க்ஷ ஸ்ரீ என்னும் ஆறெழுத்துகள் புகுத்தப் பட்டுப் புழக்கத்தில் விடப்பட்டுள்ளன. ஆனால் இவற்றைத் தமிழிலக்கணம் ஏற்றுக்கொள்ளவில்லை. அவற்றுக்கான இலக்கணக் கூறுகளும் தமிழில் இல்லை. அவை இடம்நிரப்பிகளாகப் பயன்படுத்தப்படுகின்றன. ஒரு செம்மொழிக்கு இவை எந்தப் பலனையும் அளிக்கப் போவதில்லை. இவ்வெழுத்துக்கள் புகுத்தப்பட்டவை காலத்தின் தேவையோ இலக்கியத் தேவையோ அல்ல. இவை இல்லாமலேயே தனித்தியங்க வல்ல செம்மொழி தமிழாகும்.

மற்ற மொழிகளைக் காட்டிலும் இந்திமொழி வளர்ச்சிக்கு அதிக செலவு செய்யும் இந்திய ஒன்றிய அரசு விழலுக்கு நீரை இறைத்துக் கொண்டிருக்கிறது என்பதைப் புரிந்துகொள்ள வேண்டும். வாய்ப்பேச்சு வீரனைப்போல் தமிழைப் பெருமையாகப் பேசிவிட்டு இந்தியைப் பரப்புவதை மட்டுமே செயலாகக் கொண்டிருப்பது மாற்றாந்தாய் மனப்பான்மை ஆகும்.

இந்தி என்பது இந்தியாவின் தேசிய மொழி இல்லை. உண்மையில் இந்தியாவுக்குத் தேசிய மொழி என்ற ஒன்று இல்லவே இல்லை. இருக்கவும் முடியாது. இருப்பினும், CBSE பாடத்திட்டமும் தனியார் இந்தி வகுப்புகளும் இந்தியாவின் தேசிய மொழியாக இந்தியைத் தவறாகக் கூறி மக்களைத் தவறாக வழிநடத்திக் கொண்டு இருக்கின்றன. இந்தியா என்பது ஒரே நாடு அன்று, பல மொழிகளைப் பேசும் நாடுகளின் கூட்டமைவு.

சங்கதம் மற்றும் இந்தியின் வேர்கள் வெளிநாட்டு மொழிகளில் உள்ளன. இந்தியைத் திணிப்பது இந்தியாவின் மூலக் குடியினரை ஆளும் செயலாகும். சிறுபான்மையினர் பெரும்பான்மையினரை அவர்களின் சொந்த நாட்டிலேயே ஆளுகின்றனர்.

The language of the uneducated common people must have been a simple one. It could not have contained clusters of consonants and aspirated sounds that are difficult to pronounce easily. Pronouncing such sounds requires great effort. If people have to expend so much energy just to speak, how can they focus on other things?

The South Indian languages have not been as mixed as the North Indian languages. Due to the influence of Sanskrit, all South Indian languages except Tamil have adopted consonant clusters and aspirated sounds. The speakers of these languages have been misled by this linguistic blending.

In Tamil also, six letters—ஜ Ja, ஹ Ha, ஷ Sha, ஸ sa, க்ஷ ksha, and ஸ்ரீ Sri —were introduced and put into usage. However, Tamil grammar has not accepted them, nor does Tamil have grammatical rules for these letters. They are used merely as fillers. These letters do not provide any benefit to a classical language. Their introduction was neither a necessity of the times nor a literary requirement. Tamil, as a classical language, is capable of thriving independently without them.

Compared to other languages, the Government of India is pouring resources into the growth of the Hindi language like watering a barren land. This must be understood. Merely speaking proudly about Tamil like an eloquent orator while promoting or imposing Hindi is nothing but a stepmotherly attitude.

Hindi is NOT the national language of India. In fact, India does not have a national language, nor can it have one. However, the CBSE syllabus and private Hindi classes are misleading people by falsely claiming that Hindi is the national language of India. India is not a single nation but a federation of multiple linguistic nations.

The roots of Sanskrit and Hindi lie in foreign languages. Imposing Hindi is an act of dominating India’s original people. The minority rules over the majority in their own land itself.

Dec 27, 2024

விரும்புவீர்

நேரிசை ஆசிரியம்

அண்டத் துள்ளது பிண்டத் துள்ளதான்
அனைத்தும் தொடர்புடை ஆற்ற லுடைத்தாய்க்
கொடுப்பது கொடுக்கும் விடுப்பது விடுக்கும்
வினைத்தது விளைக்கும் விளைத்தது வினைக்கும்
நினைப்பது நடத்தும் நடந்தது நினைக்கும்
இனைத்தென உணரா இன்னுயிர்
வினைத்தகு மக்காள் விரும்பு வீரே!

Dec 19, 2024

சமத்துவ இந்தியா - பெயரில் மட்டும்தான்

சாதிக்கு மட்டுமன்று
சமூக நீதிக்கும்தான்
சலுகைகள் வழங்கும்
சட்டங்கள் கொண்டது
சமத்துவ இந்தியா
பெயரில் மட்டும்தான்

இலஞ்சப் பேய்கள்
அஞ்சாமல் வாழும்
வஞ்ச நாய்கள்
நிமிர்ந்து நடக்கும்
கருத்துச் சுதந்திரம்
கறுத்த தந்திரமான
சமத்துவ இந்தியா
பெயரில் மட்டும்தான்

Dec 9, 2024

சமூக வலைத்தள உறவுகள்

அகமே அகமே தனிமையினை
   ஆளத் தெரியா எனக்கென்றே
இகமே வாய்த்த தென்பதுவாய்
   இந்தச் சமூக வலைத்தளங்கள்
முகமே அறியா உறவுகளை
   முழுதும் நம்பிப் பேசுகிறேன்
திகட்டத் திகட்டப் பேசுகின்ற
   தித்திப் பான பேச்சுடையள்

அண்ணன் தம்பி என்றேயான்
  அழைத்தல் மூலம் என்னுறவைத்
திண்ண மாக உரைக்கின்றேன்
   தீமை யில்லா என்பேச்சை
வண்ண மயமாய் மாற்றுவது
   வாஞ்சை எனக்கு வேறென்ன?
எண்ணம் தூய்மை என்போக்கில்
   எந்தத் தவறும் இல்லையன்றோ?

அன்பு பாசம் அன்றாடம்
   ஆத ரிக்கும் அவர்சொற்கள்
இன்புக் கிடமாம் நிழற்படங்கள்
   எடுத்து நானும் அனுப்புவதும்
நன்று நன்றென் றவருரைக்கும்
    நயமாம் சொல்லைக் கேட்பதுவும்
துன்பம் மறக்கத் துணைநிற்கும்
    தூணாய் நின்று வழிநடத்தும்

ஆனால் இன்றோ நானவருக்(கு)
   அனுப்ப வில்லை புதுப்படத்தை
ஏனோ? பேச மறுத்துவிட்டார்
   என்மேல் அன்பைப் பொழியவில்லை
தேனாய் வந்து விழுகின்ற
   தித்திப் பான சொல்லில்லை
போனால் போதும் எனமீண்டும்
   போட்டேன் எடுத்த படத்தினையே

படத்தைப் பார்த்துப் பழையபடி
  பாசம் பொழியத் தொடங்கிவிட்டார்
அடடா என்ன நடக்கிறதோ?
   ஆர்வம் குழப்பம் எனக்கின்று
கடந்து விடவா? அவர்கொண்ட
   கருத்தும் சொல்லும் தவறென்று
தொடர்ந்து விடவா? உறவினையே
  தொல்லை ஏது மில்லையென்றே
                                   - தமிழகழ்வன்

Dec 1, 2024

பெஞ்சல் புயல் (Cyclonic storm Fengal)

இலங்கையில் நீர்பரப்பி இன்னும் போதாது
நிலைகொண்டு நிலைகொண்டு நேரிய தமிழ்நாட்டிற்
பெயல்வேண்டிப் புயலாய்ப் பெஞ்சலெனப் பேர்கொண்டு
வயனெடு வளம்பரப்பும் வான்மழை வாழியவே!
                                - தமிழகழ்வன்

Nov 30, 2024

இது விளையாட்டா?

உலகம் இந்நாள்  உணரா தவளே!
அலரினைக் கண்டொரு நாளும் அஞ்சா(து)
ஈண்டென் செய்கிறாய்? இதுவிளை யாட்டா?
வேண்டுவ தென்னவோ? வேட்கை என்னவோ?
நாடொறும் நாடி வலைத்தளம் மூலம் 
அறியாப் பலரொ(டு) அளவ ளாவலும் 
மீண்டும் மீண்டும் முகிழ்க்கும் மலராய்
அடுத்த நாளே மறந்ததாய்க் காட்டி
உறவு முறையில் உடன்பிறந் தான்போல்
உரிமைச் சொற்கொண்(டு) உரையா டுவதும் 
எல்லை மீறியோர் எடுத்தாள் கின்ற
குலவு மொழிக்கும் குதுகலம் அடைதலும்
பாது காப்பினைக் காற்றினில் பட்டமாய்
யாது முணராது பறக்க விடலும் 
எங்கே முடியும் என்றறி யாத
நங்காய் உனக்கு நல்லழ கிலவே!

Nov 14, 2024

காலம் கடந்தபின் வந்த ஞானம்

உள்ளத் துள்ளே ஓடுவ தென்ன?
கள்ளத் துள்ளே கரைத லின்றி
மெல்ல மெல்லப் புரிந்து கொள்ள
நல்ல வாய்ப்பாய் வாய்த்த சமூக
வலைத்தளத் தூடே வரையறை யின்றி
அளவ ளாவும் ஆவல் கொண்டு
களவ ளாவ லாகக் கனிந்தேன்
இஃதென் னுரிமையோ? இடந்தரு நிலைமையோ?
உறவா? நட்பா? உறவில் எவ்வகை?
முகமறி யாத முனைவிஃ(து) அறமா?
காலம் பதில்சொலக் காத்திருந் தேனே
காலம் கடந்தபின் வந்தது ஞானமே
                             - தமிழகழ்வன்

நண்பர் அருண்குமார் எழுதச் சொல்ல எழுதியது.

Nov 5, 2024

இந்தக் காலப் பிள்ளைகள் - சமுக வலைத்தள அடிமைகள்

புரியாத புதிராய்ப்
புளகாங்கிதம் அடைந்தேன்
புன்னகை பூத்தன உதடுகள்
புதுமலர்ச்சி கொண்டது என் முகம்
புதிதாய் ஓர் உறவு

நட்பு நாடி வந்தது...
நலமா? என்றது
நாட்டமெல்லாம் என்ன?
நாளெல்லாம் என்செய்வாய்?
நானாகக் கூறும் முன்
நாலாயிரம் கேள்விக் கணைகள்

அடுக்கடுக்காய் வந்ததிலே
அசந்து போனேன்
அப்படி என்ன
ஆர்வம் அவளுக்கு?

ஒருவேளை
உளவு பார்ப்பவளோ?
இல்லை இல்லை
உதவி கேட்பவளோ?
இல்லை இல்லை
உடன்பிறவாத உறவானவளோ?
இல்லை இல்லை
ஒரே வகை விருப்பமுள்ள
உள்ளம் நாடி வந்தவளோ?
உண்மையைச் சொல் எனக்
கேட்க மனமில்லை
கேட்டுக் கொண்டே இருந்தேன்
கேண்மையானவளின்
கேள்விகளையே
ஏன் ஏன் என்று

ஊர் உறங்கிய பொழுதிலும்
உள்ளம் உறங்காமல்
உறவாடிக் கொண்டே இருந்தது
உவகை உற ஆடிக் கொண்டே இருந்தது
உனக்கென்ன பிடிக்கும்? என்றாள்
உன்னுடைய கொள்கை என்னென்றாள்?
தனக்கென்ன பிடிக்கும்
தன்கொள்கை இதுவென்று
தாராளமாய்ப் பகிர்ந்தாள்

ஆறு மாதம் ஆனதும் அவள்
வேறு விதமாய் வந்தாள்
கொஞ்சங் கொஞ்சமாய்த்
தன் பேச்சை அடக்கிக் கொண்டாள்
என்பேச்சையும் கேளாமல்
அடங்கிக் கொண்டாள்

காரணம் என்னவென்று
புரியாமல் விழித்தேன்
காலத்தை வெறுமையில் கழித்தேன்

"முகம் பார்த்திராத
மூத்தவனாய்க் கொண்ட ஒருவன்
வேலைப் பளுவால்
விட்டு விலகியவன்
மீண்டும் வந்துவிட்டான்
முன்போல் என்னிடம் 
பேச வியலாது" என்றாள்
"அவன் சொன்னால்
அப்படியே நிற்பேன்
அப்படிப்பட்ட அண்ணனவன்"

எப்படி இப்படிப் பேசினாள்
எதிரே இருந்தும்
இழுபறியாய்க் கடக்கும்
முகிற்கூட்டம்போல்
முனைந்து சென்றாளோ?
காலத்தைக் கடக்க மட்டுமே
கடிதில் உறவைக் கொண்டாளோ?
அவளே அதை முறித்தாளோ?

Oct 26, 2024

மீனழகு - ஆசிரிய விருத்தம்

மின்னி மின்னிச் சிரிக்கின்ற
   மீன்கள் கோடி வானத்தில்
கண்ணில் பட்ட ஒருமூன்று
   கருத்தில் நுழைந்து களிப்பூட்டும்
மின்னும் அவையோ நேர்க்கோட்டில்
   மீண்டும் காணோம் எனத்தேடும்
அன்ன நிலவு குழந்தையைப்போல்
   ஆர்வத் தோடு நான்களிப்பேன்

பல்வான் அலகு தூரத்தில்
   பல்லைக் காட்டும் மீனழகு
நில்லா மேகம் மறைத்தாலும்
   நின்றொ ளிர்ந்தொ ளிந்திருக்கும்
எல்லாம் உணர வைக்கின்ற
   எண்ணம் கூட்டும் இவ்வுலகில்
இல்லாச் சுவையும் பொதித்திருக்கும்
   இன்னும் இன்னும் களிப்பூட்டும்

எண்ணி எண்ணி வியந்திருந்தேன்
   எல்லா மீனும் ஒளிருமெனக்
கண்கள் விருந்தால் களித்திருக்கக்
   கடிதில் மறையும் சிலமீன்கள்
விண்ணில் தொலைவில் ஒளிர்வதெல்லாம்
   விரும்பா தோவந் தருகமைய
நண்ண லில்லை நம்கைக்கு
   நடப்ப தில்லை நம்மோடே

- கருத்தாக்கம்: அருண்குமார்
- கவியாக்கம்: தமிழகழ்வன்

Oct 24, 2024

காரணம் உண்மையா பொய்யா?

காரண மின்றிக் காரிய மில்லை
காரண மொன்றக் கவலைக ளில்லை
காரண மில்லாப் பொய்ம்மையி னாலே
காரியம் நன்மை பெறுவது மில்லை
காலமும் சிலவே கண்களை மறைக்கும்
கடிதினில் உண்மை கருவிழி நிறைக்கும்
காரணம் பொய்யின் காலடி வீழின்
கசப்பென மாறும் வாழ்க்கையும் பாழே!