இன்பொருள் மென்பொருள்

மின்பொருள் கண்டார் வியனறி வியலார்

மின்னணு வியலாம் நுண்பொருள் கண்டார்

கண்ணெனும் எண்ணும் எழுத்தும் கருதி

மின்னும் திரையில் இன்பொருள் கண்டார்

என்பொருள் என்னின் மென்பொரு ளாமே

வன்பொருள் எல்லாம் மென்பொரு ளாக்கும்

அறிவின் ஊற்றாய் அதுவளர்ந் தோங்கி

நுண்ணறி வினையும் செயற்கை செய்தார்

வையத் தளவில் வாணிக மெல்லாம்

செய்யக் கொடுத்தார் செயற்பொறி யாளர்

மென்பொரு ளின்றியிவ் வுலகில்

என்பொருள் இயங்கும் என்னும் நிலையே!

                        - தமிழகழ்வன் சுப்பிரமணி 

இனிய பிறந்தநாள் வாழ்த்துகள் மணிமேகலை

அணிமே கலையாம் மணிமே கலையே
துணிவே துணையாய்த் துலங்குக உலகே!
உன்னைத் துரத்தும் ஓங்கு துயரெலாம்
உன்னைத் துறந்தும்என்(று) ஓடி ஒழியட்டும்
கண்ணை மூடிக் கவன்ற போதெலாம்
விண்ணை முட்டி வெடிமழை பொழியட்டும்
இனிய பிறந்தநாள் வாழ்த்துகள் தங்காய்!
நனிமகிழ் வோடு நானிலம் வாழ்கவே!