எண்ணம்போல் செயல்

நேரிசைக் குறள்வெண்பா

செல்லா மனத்தாற் செயலாகா சொல்லாத
சொல்லாற் படுங்காதற் சோர்வு

சொல்லாத சொல்லால் காதல் சோர்வு படும் - சொற்களால் வெளிப்படுத்தாது காதல் நிறைவேறாது. (அதுபோல)
செல்லா மனத்தால் செயலாகா - மனம் ஈடுபடாவிட்டால் செய்ய வேண்டிய செயல் நிறைவுறாது.

மனம்போல் வாழ்வு

மனம்போல் வாழ்வு

ஒவ்வொரு நாளும்

செய்யும் ஒவ்வொரு செயலிலும்

செல்லும் மனத்தின் ஆவலே

செய்யும் தன்மையைத் தேர்ந்தெடுக்கிறது

சில நேரம்

தேவையானதைச் செய்வோம்

சில நேரம்

தேவையற்றதைச் செய்வோம்

சில நேரம்

தேவையானது தேவையற்றதாகிவிடும்

சில நேரம்

தேவையற்றது தேவையானதாகிவிடும்

விழுவாய் எழுவாய்

நேரிசைக் குறள்வெண்பா

விழுவாய் பயனிலை வீணே எழுவாய்

எழுவாய் பயனிலை ஏற்று

புதுமனைப்புகுவிழா வாழ்த்துகள்

புதுமனைப் புக்குப் புத்துணர் வுற்றுக்

குதுகலத் தோடு குலந்தழைத் தோங்கும்

வளமும் நலமும் பெற்று

வாழ்கபல் லாண்டே! வாழ்கபல் லாண்டே!

                - தமிழகழ்வன்

ஊக்குக உம்மையே

தொடக்கமும் பாடு பொருளும் தொடுக்க

மடையுடைத்து வெள்ளம் வரும்     1

வருவெள்ளத் தாவல் வழியறியா தாயின்

பெருவெள்ளம் ஏய்த்து விடும்        2

விடாஅ முயற்சியான் வேறு படுத்தி

அடாதனசெய் வாரை அடக்கு        3

அடக்கம் புகழ்ச்சிக்(கு) அழகாம் மடக்கிக்

கடக்கப் பழகல் கலை                       4

கலைகட் குயிராய்க் கருதச் செறிவாய்

நிலைக்க மனத்தால் நினை          5

நினைப்புப் பிழைப்பைக் கெடுக்குமாம் என்ற

நினைப்பை நிலைகுலையச் செய்  6

செய்கை சரியில்லை சேர்க்கை சரியில்லை

வைவாய் வழுத்தட்டும் வாழ்         7

வாழ்வு முறையினை மாற்றி யமைத்தற்குப்

பாழ்வாய்ப் பழக்கங்கள் போக்கு  8

போக்கும் பொழுதெலாம் போதும் இனித்தொலை

நோக்கிப்பார் நோக்கா தன            9

நோக்கம் இலாத நொடிக்கும் அதனாற்சீர்

தூக்கி உயரம் தொடு                       10

உழவனின் நம்பிக்கை

நேரிசை இருவிகற்ப அளவடி வெண்பா

வெள்ளி முளைக்க விடியுமென நம்பியவர்

துள்ளி யெழுந்து தொடங்குவார் அள்ளக்

குறையா வமிழ்தாய்க் கொடுக்கின்ற விண்ணின்

நிறையா அவாஅ நினைந்து

இனிய போகி நாள் வாழ்த்துகள்

தரவு கொச்சகக் கலிப்பா

பாரெங்கும் பனிமூட்டம் பகலவனோ கதிர்நீட்டி
ஏரெடுத்துப் பார்க்கின்றான் எழுந்திருங்கள் எழுந்திருங்கள்
காரென்னும் பெரும்பொழுது கழிந்ததுபோல் பழஞ்சிந்தை
வேரெடுத்துச் சீர்தூக்கி வேண்டாத யாங்களைவீர்

பாடென்று நினைந்தவற்றைப் பலவாறாய்ச் சிந்தித்துக்
கேடென்று நீரறிந்தால் கிளப்புங்கள் இனிவேண்டா
வீடெல்லாம் நனிநோக்கி வேண்டாத குப்பைகளை
நீடென்று காக்காமல் நீக்குங்கள் போகியன்றே

காந்தி ஆசிரியர் - இரங்கற்பா

காலத்தால் அழியாத
காவியமாய்க் கவிமழையாய்
வாழத்தான் விளைந்தவரே
வாழ்வாங்கு வாழ்ந்தவரே!

வருத்தவளை வேயரசர்
மாமுடியின் மேலாம்
கருத்துமழை வழிகாட்டிக்
கண்கலங்கச் சென்றவரே!

ஆங்கிலமும் அருந்தமிழும்
அமுதாக்கிக் கற்பித்தீர்!
தீங்கிரிக்க நாடெல்லாம்
திருக்குறளை எடுத்துரைத்தீர்!

திருக்குறளில் கணிதவியல்
தேர்ந்தெடுத்துச் சொன்னவரே!
திருக்குறளே பெருந்தவமாய்த்
தொழுதெழுந்து வாழ்ந்தவரே!

கணக்குப் பிணக்கறுத்து
மணக்குமெனக் காட்டியவரே!
வணங்குவோம் எம்வாழ்வைச் 

செதுக்கியவரே! ஆசானே!
                                     - கண்ணீருடன் 

தமிழகழ்வன் சுப்பிரமணி சேகர்

மனிதம்

மனிதம்
என்பது மட்டுமே
அடையாளம்

மற்ற உயிர்களினின்று
வேற்றுமைப்படுத்தும்
அடையாளம்

நாடு இனம்
மதம் மொழி
வகுப்பு குலம்குடி
இன்னும்
எத்தனையோ பெயர்கொண்டு
எப்படியெல்லாம் அடையாளம்கொண்டு
பிரிந்து பிரிந்து மனிதம் இழந்து
படைமேற் கொண்டு போர்செய்து
படைத்த வரலாற்றால்
மனிதம் மறந்த மனம்

இவை எல்லாம் துறந்து
மனிதத்தோடு மனம் ஒன்றுவது
எந்நாளோ?

போரை நிறுத்துவீர்

நிலைமண்டில ஆசிரியப்பா

உலகம் உவத்தல் உடைத்தா காது
நிலைஇய தன்மை நீடிக் காது
கலகம் கலகம் காணின் எங்கும்
பன்னூ றாண்டுகள் பாரில் வாழ்ந்தும்
நன்னூல் அறங்கள் நாணும் படியாய்ப்
பக்குவம் பெறாஅது பண்பிற் சிறவாது
கொலைவெறி கொண்டார் கொடுங்கோன் மறவர்
ஒன்று படாஅ உள்ளங் கொண்டார்
நின்றெதிர் புரியும் நெடும்போர் காணீர்
இனமென மதமென மொழியென வகுப்பென
எத்தனை பிரிவுகள் எத்தனை பிரிவுகள்
இயற்கையான் அழிவுகள் போதா வென்று
பகைமை பூண்டு படைமேற் கொண்டு
கொன்று குவிக்கும் கொடுமை காணீர்
யாரை நோவதி யாரை நோவதி
யாரை நோவதோ? யாங்கா ணேமே.